Oğurlanan 200 min manata aydınlıq gətirilmədi

İş adamının evinin qarət olunması ilə bağlı məhkəmədə dava düşdü Zərərçəkən: «Pulu Rusiyada qazanmışıq» Dünən Ağır Cinayətlərə Dair İşlər üzrə Məhkəmədə hakim Tamella Nəsrullayevanın sədrliyi ilə Bakı şəhər sakini Ruqiyyə Məmmədovanın evinə basqın edərək, 200 min manat oğurlamaqda təqsirli bilinən AXCP-nın sədri Əli Kərimlinin müşaviri Qalib Məmmədrzayev və digərlərinin məhkəmə prosesi davam etdirilib. Məhkəmə qarşısında Q.Məmmədrzayevlə yanaşı, Mirzə Ağayev, Racu Mehrəliyev, Hüseyn Qurbanov, Elnur Mirzəliyev cavab verir. Proses başlanan kimi hakim zərərçəkmiş Ruqiyyə Məmmədovanı vəkillərin vəsatəti əsasında təkrara məhkəməyə dəvət etdiklərini açıqladı. Məhkəmə qarşınıda ifadə verən Ruqiyyə Məmmədova əvvəlki ifadəsini təsdiqlədi. Zərərçəkmiş evindən oğurlanan 200 min manatdan əlavə olaraq əvvəllər ailə sürücüsü olmuş təqsirləndirilən Mirzə Ağayevə 200 min ABŞ dolları da verdiyini qeyd etdi. O, bildirdi ki, həmin pulu da Mirzə Ağyavedən ala bilmədiyi üçün hüquq-mühafizə orqanlarına şikayət edib. Daha sonra vəkillər zərərmiş şəxsə maliyyə mənbəyi ilə bağlı sullar verdilər. Ruqiyyə Məmmədova bildirdi ki, 1992-ci ildə Rusiyada bizneslə məşğul olublar və həmin illə kimi də maliyyə qazancı əldə ediblər. Onun sözlərinə görə, 1992-ci ildə Azərbaycana köçüblər. Zərərçəkmiş Rusiyada qazandıqları pulları da özləri ilə Azərbaycana gətirdiklərini açıqladı. Onun sözlərinə görə, ata və anasından qalan mülkləri sataraq pul əldə edib: “Mənə atamdan xeyli qızıl qalıb. Həmin qızılları pula çevirmişəm. Təqsirləndirilən Hüseyn Qurbanov bildirdi ki, zərərçəkmiş şəxsin iddia etdiyi pul evdən oğurlanmayıb. Onun sözlərinə görə, xanımın Mirzə Ağayevlə şəxsi qərəzi olub. Onun sözlərinə görə, 200 min manat söhbəti də bu şəxsi qərəzdən irəli gəlir: “Xanım 200 min manatının harada olmasını yaxşı bilir. Amma istəyir ki, həmin pulu bizdən çıxarasın. Bizim 200 min manatımız yoxdur ki, ona verək”. Bundan sonra Hüseyn Qurbanov cinayət işinin istintaqını aparan Nəsimi rayon Polis İdarəsinin müstəntiqi Müşfiq Əlməmmədovun məhkəməyə çağırılması barədə vəsatət qaldırdı. Prokuror bildirdi ki, müstənqin məhkəməyə çağırlıması barədə verilən vəsatətin hüquqi əsası yoxdur”. Məhkəmə prosesi dekabrın 10-da davam etdiriləcək. Hacı ZEYNALOV