Özgə arvadının yatağında meşəbəyinin qanı axdı

07 Dekabr 2010 [17:15] - Milli.Az

Toydan evə qayıdan sərxoş traktorçu arvadını başqa kişi ilə yaxaladı...

Kürdəmir rayonunda namus üstündə qan tökülüb. Rayon Polis Şöbəsindən Milli.Az xəbər portalına verilən məlumata görə, qanlı hadisə Garıs Əyribənd kəndi ərazisində baş verib. Kənd sakini 31 yaşlı Elşən Bünyadov sərxoş halda münaqişə zəminində Ağsu rayon sakini 25 yaşlı Elşən Ələkbərovu bıçaqlayıb. İşin istintaqını aparan müstəntiq Sadiq Əfəndiyev Milli.Az xəbər portalına açıqlamasında bildirdi ki, Sabirabad Toxumçuluq İdarəsində traktorçu işləyən Elşən Bünyadov gecə saatlarında toydan evə qayıdarkən evində işıqların yanmadığını görüb. Bundan şübhələnən E.Bünyadov sakitcə evə daxil olub və yataq otağına girib. İşığı yandıranda isə yad bir kişini arvadının yanında görüb. Həmin şəxs Elşən Bünyadovu vurub qaçmaq istəsə də, istəyinə nail olmayıb. Onlar arasında dava düşüb. Həmin şəxs yenidən onun əlindən çıxıb qaçmaq istəyərkən E.Bünyadov mətbəxdən bıçaq götürərək ona kürək nahiyəsindən zərbə endirib. Yaralı xəsarətlə Ağsu rayon xəstəxanasına çatdırılıb. E.Ələkbərov Sabirabad Meşə Təsərrüfatında gözətçi işləyir. Faktla bağlı araşdırma aparılır. Anar Məmmədov Milli.Az