PİŞİK İLİNDƏ BİZİ NƏ GÖZLƏYİR?

“Ümidlər ili”ndə yaxşı istirahət də ola bilər, güclü zəlzələ də “Pələng ilində dünyada insanlar çox gərgin dövr yaşadı: iqtisadi böhran, məhəlli münaqişələr, dəhşət miqyaslı təbii fəlakətlər, siyasi-hərbi gərginlik, epidemiyalar və s. Cəsarətlə deyə bilərik ki, qarşıdakı ildə bu hallar çox aşağı faiz göstəricisinə düşəcək. El dilimizlə desək, qulağımız dinc olacaq. Bundan irəli gələrək yaxşı istirahət etməyə, təbiət qoynunda doğma və yaxınlarla dincəlməyə də şərait olacaq”. Bunu hər gün “Yeni Müsavat”ın oxucularına astroloji proqnozlar təqdim edən, “Qoroskop” qəzetinin baş redaktoru Səbuhi Rəhimli bildirir. Məlum olduğu kimi, Şərq təqviminə əsasən 2011-ci il Metal ünsürlü Ağ Pişik ili olacaq. S.Rəhimlinin fikrincə, Pişik ili əslində fevralın 3-də başlayacaq. O vaxta qədər Pələng ili hakim olduğu üçün ötməkdə olan ildə baş verən gərginlik hələ də davam edəcək: “Bir neçə dövlətdə hakimiyyət dəyişikliyi də gözlənilir. Qarşıdurmalar da davam edəcək. Xüsusən də yanvarın birinci yarısında dünya ölkələrində, xüsusilə Avropada sensasion hadisələr olacaq”. Astroloqun proqnozuna görə, fevralın 3-dən sonra vəziyyət kəskin surətdə dəyişəcək: “Çünki Pişik illəri bir qayda olaraq sakit keçir. Təbii ki, söhbət ümumi atmosferdən, qarşılıqlı münasibətlərdən və cəmiyyətin inkişafı prosesindən gedir. Bütün dövrlərin astroloqları Pişik illərini ”ümidlər ili" adlandırıblar". S.Rəhimli Pişik ilini “ümidlər ili” adlandırmaq üçün əsasları olduğunu da bildirdi: “Bütün astroloji mənbələr göstərir ki, bu ildə insanlar öz enerji və qüvvələrini daha çox münasibətlərə, ailə və dostlara sərf etməlidirlər. Yalnız bu halda ilin ”oyun qaydalarına" riayət etmiş olarlar. Yeri gəlmişkən, Pişik yalanı və xəyanəti bağışlamır, əyyaşları, narkomanları isə sevmir. Bu isə cəmiyyətin sağlamlaşmasına öz töhfələrini verə bilər.  Axı Pişik həm də şəfakardır, sabitliyin himayədarı, cəsarətli insanların qoruyucusudur. Ailə və qohumluq zəminində olduğu kimi, yaradıcılıq müstəvisində də hər bir mübahisəni həlim və diplomatik şəkildə həll etmək pişiyin xoşuna gəlir". Qeyd edək ki, 12 ildən bir müxtəlif heyvanların adını daşıyan Şərq nücum təqviminə görə Pişik ilini bəzən Dovşan ili də adlandırılır. S.Rəhimli isə bildirir ki, bütün qədim mənbələrdə bu illər başqa adla çağrılmayıb, həmçinin ilin xarakterik cizgiləri, reaksiya və davranışları pişiyə daha çox uyğundur: “İlin əsl adı Pişikdir. Dovşan adı isə son üç əsrdə çəkilməyə başlayıb. Amma bizlər üçün bu, mübahisə predmeti deyil - qoy kim necə istəyir desin, təki ümumi mənfəətdən hamı yararlansın”. Astroloq Ağ Pişik ilinin 12 dekabr 2012-ci ildə başa çatdığını da  vurğuladı: “İlin planeti: Yupiter, ilin uğurlu ayları: mart, dekabr,  uğursuz ayları isə iyun, sentyabr hesab edilir. Düşərli gün: cümə axşamı, cümə, ilin ağır günü isə çərşənbə axşamıdır.  İlin düşərli təqvimləri: 3, 4, 6, 7, 9, 11, numeroloji rəqəmi: 4-dür”. S.Rəhimli Pişik ilində aparıcı bürclərin, rənglərin, daşların da adlarını sadaladı: “Oxatan, Balıqlar ilin aparıcı bürcləridir. Pişik, Keçi, Qaban isə aparıcı işarələrdir. Göy, narıncı, ağ, bənövşəyi bu ilin düşərli rəngləri, ilin daş-qaşı: sapfir, ametist, zümrüd, ilin metalı isə sinkdir. Nərgiz, qərənfil, yasəmən bu ilin uğurlu çiçəklərindəndir: İlin talismanı: nal, düyündür”. S.Rəhimli İtaliya, Rusiya, Kiçik Asiya, Portuqaliya, Macarıstan, Yuqoslaviya, İspaniya, Latın Amerikası (Meksika və Braziliyadan başqa), ərəb ölkələri Pişik ilində aktiv ölkələr sırasında olduğunu dedi. Astroloq Pişik ilində baş verən mühüm hadisələri də təqdim etdi: Səlibçilər ordusu Qüdsdə qətliam törədib; Gürcü çarı II İrakli Rusiya təbəəliyini qəbul edib; İranda Qacarlar sülaləsinin görkəmli nümayəndəsi Ağa Məhəmməd şah hakimiyyətə gəlib; II Yekaterina Tiflisdə rusların möhkəmlənməsi barədə fərman verib; Qırğız torpaqları Rusiya imperiyasının təbəəliyini qəbul edib; Nobel qardaşları Bakıda fəaliyyətə başlayıblar; Rusiya Sevastopolu işğal edib; Qori seminariyasında Azərbaycan şöbəsinin yaranması haqda qərar verilib; Dünyada ilk dəfə olaraq təyyarənin uçuşu sınaqdan keçirilib; Gülhanə Hərbi Tibb Akademiyası fəaliyyətə başlayıb; Şamaxıda güclü zəlzələ olub; Türk ordusu Çanaqqalada zəfər çalıb; Ermənilər Şamaxıda qırğın törədib; Macarıstan Avstriyadan ayrılaraq müstəqillik elan edib; İraq istiqlaliyyət qazanıb; Dünyada ilk televiziya verilişləri yayınlanmağa başlayıb; Mikayıl Müşfiq güllələnib; II Dünya müharibəsi başlayıb; Sovet ordusu Polşanı işğal edib; İordaniya kralı Abdullah ibn Hüseyn öldürülüb; Valentina Tereşkova ilk qadın kimi kosmosa uçub; Laos Xalq Demokratik Respublikası elan edilib; Qüzey Kıbrıs Türk Cümhuriyyəti qurulub; Türkiyənin dörd şəhərində (Kocaeli, Sakarya, Yalova və İstanbul) 17 min 127 adamın ölümü ilə nəticələnən dəhşətli zəlzələ baş verib; Türklərin ən amansız düşməni, 30 min türkün ölümündə əli olan kürd terror şəbəkəsi PKK-nın rəhbəri Abdulla Öcalan həbs olunub; Bakı-Tiflis-Ceyhan neft-boru kəmərinin çəkilişi haqqında saziş imzalanıb; Terrorçular Ermənistanın Milli Məclisinə silahlı basqın edərək baş naziri, spikeri və digər bir neçə tanınmış şəxsi qətlə yetiriblər; NATO qüvvələri Serbiya və Kosovanı bombalayıb... Qarşıdan gələn iliniz uğurlu olsun! Nərgiz İSMAYILOVA