rayonların rəhbərləri

Onların arasında paytaxt rayonlarının rəhbərləri də var

Yaxın günlərdə bir sıra şəhər və rayonların rəhbərləri - icra hakimiyyətlərinin başçıları tutduqları vəzifələrdən azad ediləcəklər. Bu barədə məlumat etibarlı mənbələrdən ötən gün "Gündəlik Bakı" qəzetinə daxil olub.

Mətbu orqanımızın ən mötəbər instansiyalardan əldə etdiyi səhih məlumatlara görə, ayrı-ayrı sahələrə dövlət tərəfindən ayrılan vəsaitlərin mənimsənilməsində, yerlərdəki sosial problemlərin aradan qaldırılmamasında, korrupsiya məsələlərində adı hallandırılan, habelə rəhbəri olduğu rayonun qış mövsümünə hazırlığını lazımınca təmin etməyən məmurların öz vəzifələrindən kənarlaşdırılacaqları gözlənilir. Qəzetimizi bilgiləndirən mənbənin sözlərinə görə, vəzifə səlahiyyətlərini aşmış, vətəndaşlara qarşı bürokratik əngəllər törətmiş məmurlar tutduqları postlara "əlvida" deməli olacaqlar. Bu prosesə isə bir neçə gündən sonra - gələn ilin əvvəllərində, yanvarda start veriləcək. Mənbəmizin məlumatına görə, bir sıra rayonların sıravi vətəndaşlarının paytaxta ünvanlanmış çoxsaylı ərizə və şikayətləri respublikamızın şimal-qərb, Aran, habelə cənub rayonlarının rəhbərlərinin yerində olmadıqlarını göstərir. Hazırda müxtəlif bölgələrdən gələn şikayət məktubları, sakinlərin bəzi məmurlardan haqlı narazılıqlarını ifadə edən ərizələr sistemləşdirilir. Qeyd edək ki, 2009-cu ilin sonlarında, 2010-cu ilin əvvəllərində Azərbaycanın bir sıra şəhər və rayonlarından, o cümlədən Naftalan, Ağdam, Ucardan, eləcə də digər şəhər və rayonlardan məmurların qeyri-qanuni fəaliyyətləri, vəzifə səlahiyyətlərindən sui-istifadə hallarını aşmaları ilə bağlı çoxsaylı şikayətlər edilirdi. Ən çox narazı vətəndaşların qeydə alındığı rayon isə Ucar idi. Həmin səbəbdən də bu rayonun icra başçısı Arzu Qafurov tutduğu vəzifəsindən kənarlaşdırıldı. Sonradan isə xeyli narazı rayon sakini ilə Arzu Qafurov arasında məhkəmə prosesinə start verildi.

Beləliklə, 2011-ci ilin əvvəli ölkəmizdə məmur dəyişiklikləri ilə yadda qalacaq.

Anar TAĞIYEV