“WİKİLEAKS”də HEYDƏROVLAR DOSYESİ

Bakıdakı Amerika diplomatlarından “fövqəlnazir”lə bağlı şok məlumatlar “Onların ailəsinin şəxsi ”Airbus-319" layneri var, nazirin iki oğlu da özlərinə “Gulfstream” təyyarələri almaq istəyir" “Wikileaks” saytı tərəfindən yayılan məxfi sənədlər arasında Azərbaycana dair daha bir şok məlumatlar üzə çıxıb. İspaniyanın “El Pais” qəzeti tərəfindən yayılan sənədə görə, Bakıdakı Amerika diplomatları Azərbaycanın ən varlı ailələrinin dosyesini hazırlayaraq Vaşinqtona göndərib. Bu dosyelərdən biri də fövqəladə hallar naziri Kəmaləddin Heydərovla bağlıdır. Bildirilir ki, gömrük xidmətinin keçmiş rəisi olan Kəmaləddin Heydərovun ailəsi Azərbaycanda ikinci ən zəngin ailədir. Onun atası Fəttah Heydərov partiya rəhbəri olub və uzun müddət Naxçıvanda işləyib. “Heydərovlar ailəsinin özəl ”Airbus 319" təyyarəsi var, lakin onun iki oğlu-Tale və Nicat da hər biri özlərinə dəyəri 20 milyon dollar olan “Gulfstream” təyyarəsi almaq istəyirlər. Onların sərvətlərinin mənbəyi barədə soruşanda Heydərovlar deyir ki, bu sərvətlər malik olduqları böyük biznes imperiyasından-qablaşdırıcı firmalardan, tikinti materialları istehsal edən zavodlardan, kimyəvi məhsulların istehsalından, tekstil məmulatlarının, kompakt-disklərin, videodisklərin, süd məhsullarının, dəri məmulatlarının satışından və digər sahələrdən qaynaqlanır. Heydərovlar həmçinin kənd təsərrüfatı məhsullarının istehsalı, fortepiano satışı, araq və şərab məhsullarının istehsalı və satışı, sığorta fəaliyyəti və digər bizneslərlə də məşğuldur. Nar şirəsi və qara kürü istehsalında da Heydərovlar inhisar haqlarına malikdir". Qəzet Heydərovların dosyesindən qısa çıxarış dərc edib, bu baxımdan dosyenin kim tərəfindən hazırlanıb göndərildiyini müəyyən etmək mümkün olmayıb. Lakin belə görünür ki, ABŞ diplomatının hazırladığı dosyedə Azərbaycanın digər oliqarxları barədə də məlumatlar əksini tapır. “WikiLeaks” bundan əvvəl Qazaxıstanın hakim siyasi elitasının həyat tərzi və sərvətləri barədə amerikalı diplomatlar tərəfindən göndərilən dosyeni, habelə Rusiya siyasi elitasının nə dərəcədə korrupsiyalaşdığı barədə hesabatı yaymışdı. Siyasət şöbəsi 9534 dəfə baxılıb